Přiražka zawěsćena

pjatk, 14. awgusta 2015
artikl hódnoćić
(0 )

Gmejna transNaturalu z 8 800 eurami spěchuje

Hamor (AK/SN). Komuna Hamor lětuši swěco-zwukowy festiwal transNaturala při Bjerwałdskim jězoru z 8 800 eurami z gmejnskeho etata spěchuje. To su radźićeljo wčera jednohłósnje wobzamknyli. Přiražka słuži prěnjorjadnje tomu, zachować kwalitny narok zarjadowanja, štož je w zjawnym zajimje. Z přiražku chcedźa atraktiwnu laserowu show na Hamorsku milinarnju kaž tež tradicionalny wohnjostroj zawěsćić. Pjenjezy maja so nimo toho za zwukowe elementy w swjedźenskim stanje a w Dźiwadle we wuchu nałožić. Cyłkownu spěchowansku sumu přewostaja zarjadowarjej festiwala, Drježdźanskej firmje foundation-entertainment. Zakład zrěčenja firmy z Hamorskej gmejnu wo spěchowanju je wobzamknjenje gmejnskeje rady z 15. januara 2015. Tehdy je so gmejnski parlament k transNaturali wuznał a organizowanje festiwala Drježdźanskej firmje přepodał. „Mjeztym smy tójšto pjenježnych darow a sponsorskich srědkow dóstali“, wujasni Roman Krautz. Wot lěta 2010 je wón koordinator projekta Bjerwałdski jězor.

wozjewjene w: Łužica
Prošu přizjewće so, chceće-li komentar podać

Serbska debata

nowostki LND