Marko Šiman a Alojs Mikławšk wčera předewzaćelow wopytałoj
Miłoćicy/Wudwor (aha/SN). Z lěta 2009 podataj so zapósłancaj sakskeho krajneho sejma Alojs Mikławšk a Marko Šiman (wobaj CDU) z kolesom po swojimaj wólbnymaj wokrjesomaj 52 a 53. Woběmaj dźe wo to, so bliže ze starosćemi a wuwićowymi tendencami rjemjeslniskich zawodow a předewzaćow zeznajomić. Jako nastajištaj so wčera rano z Budyšina do Kubšiskeje gmejny, wopytajo tam někotre předewzaća, pobyštaj tež w tamnišim gmejnskim zarjedźe a w Bošečanskej zakładnej šuli. Mjeztym zo njeměještaj drje dopołdnja problemy z wjedrom, staj popołdnju na cyłkownje nimale 70 kilometrow dołhej čarje chětro zmoknyłoj.