Nukle šćěpić je jenički kmany škit přećiwo RHD – ale žana garantija

Pančicy-Kukow/Dobrošicy (SN/MWj). Plahowanje nuklow jako jedna z najrozšěrjenišich zaběrow wobsedźerjow ležownosćow na wsach zda so tele dny na mnohich městnach wohrožena być. Wjacori plahowarjo skorža, zo je jim w běhu mało dnjow wulki dźěl jich nuklow slaknył. We Wotrowje su pady znate, zo zwostaštej z dźesać nuklow jeničce hišće dwaj, w Pančicach-Kukowje su plahowarjo połojcu wobstatka zhubili, druhdźe samo cyły. Zjaw bě wšudźe samsny. Wječor běchu nukle hišće čiłe, nazajtra ležachu w swojim pukloće mortwe z kreju wokoło klamy.