Nimo cyrkwjow su tež farske domy něme swědki stawiznow. Ze swojej lětnjej seriju so po serbskich a dwurěčnych katolskich a ewangelskich wosadach rozhladujemy a předstajamy někotre fary – dźensa Chróšćansku (kónc).
Lětsa je tomu 790 lět, zo bu Chróšćanska wosada załožena. Na městnje pohanskeho templa bě Bjarnat II. z Kamjenca prěnju křesćansku cyrkej natwarić dał. Lěta 1248 wot Kamjenskich knjezow załoženemu klóštrej Marijinej hwězdźe dowěrichu patronat nad Chróšćanskej wosadu. Susodne wsy kaž Prawoćicy, Kopšin, Nuknica, Lejno, Časecy kaž tež dźensa Wotrowskej wosadźe přirjadowane wsy Kanecy, Žuricy a Wotrow běchu hač do reformacije w lěće 1559 do Hodźija zafarowane.