Zo móža dowolowe wobrazy našich čitarjow zawěrno na jara wšelakore wašnje nastać, dopokazujetej dźensnišej přikładaj, kotrejž smy minjene dny do redakcije připósłanej dóstali. Tak je Bjedrichec swójba z Njebjelčic lětsa w Eifeli była a sej tam mjez druhim w městačku Daun njedaloko Bonna dźiwiznowy a dožiwjenski park wobhladała. Wosebite dožiwjenje bě to dźowce Tadeji, kotraž ma zwěrjata jara rady. Za nju najrjeńše bě, jako smědźeše sej wulkeho rubježneho ptaka na ruku sadźić dać (pódla).
Nic w cuzbje, ale na zahrodźe pola dźěda w Grodku je nastał wobraz Wićazec swójby z Budyšina. Dokelž běchu dny tak horce a swimmingpool hišće njesteješe, napjelni dźěd cyle jednorje wotpadkowe sudobjo za papjeru z chłódnej wodu ze studnje. Njetraješe dołho a Yaven, Wayan a Sevon móžachu so wochłódźić. Tona drje njebě runjewon wulka, dosahaše pak wšitkim třom naraz (deleka).