Město Wojerecy steji před nowym wužadanjom. W domje 2 powołanskeho šulskeho centruma na Hasy Liselotty Herrmann ma dalši dom za 150 požadarjow azyla nastać.

Wojerecy (AK/SN). Budyski wokrjes liči hišće lětsa z 3 100 nowymi ćěkancami. Za jich prěnje přijimowanje chce Swobodny stat Sakska w Großröhrsdorfje 0,6 hektarow wulku industrijowu halu wužiwać. „Naš zaměr je, ćěkancow po móžnosći fairnje po wšěm wokrjesu rozdźělić. Při tym zapřijimamy tež města z 5 000 hač do 10 000 wobydlerjemi“, podšmórny 1. přirjadnik krajneho rady Steffen Domschke wčera na informaciskim zarjadowanju wo­krjesa we Wojerecach. Něhdźe 200 zajimcow bě přišło.