Rozšěrjenja Wochožanskeje brunicoweje jamy dla ma so dźěl Slepoho južnje železniskeje čary wotbagrować. Zo bychu přichodne generacije wědźeli, kak je tule raz wupadało, móža sej to na modelu wobhladać.
Slepo (JoS/SN). Towarstwo Wochožanskich wjesnych žonow je zawčerawšim Slepjanskej gmejnje model južneho dźěla Slepoho přepodało. Wjesna rada ma nětko hišće rozsudźić, hdźe změje wón swoje doskónčne městno.
Wjesne modele zhotowjeć je wobstatk zakładneho zrěčenja gmejny z Vattenfallom z lěta 2008. W nim je zapisane, zo maja so wo wšitkich wsach gmejny, kiž su hižo wotbagrowane abo kotrež to přichodnje potrjechi, modele natwarić. W měritku 1:750 maja so wšitke wjesne struktury z twarjenjemi, pućemi, lěsami a łukami wotbłyšćować. Kelko drobneho puzzloweho dźěła sej to žada, drje jenož tón zapřimnje, kiž je modele sam widźał. Dotal nastachu dopomnjenki na Zagor, Miłoraz, Trjebink, Mułkecy a dźěla Rownoho, kotrež běchu wobstatk brunicoweho plana z lěta 1994. Nětko nasta potajkim model južneho dźěla Slepoho; k tomu přińć ma hišće model zbywaceho dźěla Rownoho.