Stare traktory jedyn z wjerškow na delanskim babylěću
Ralbicy (SN/MWj). Wot mokreje a wětřikojteje njedźele so Ralbičenjo wčera zatrašić dali njejsu. Połnje wobsadźeny bě popołdnju stan, w kotrymž wuhotowachu dźěći ze wsy a z Ralbičanskeje zakładneje šule, starše semestry Smjerdźečanskeje rejwanskeje skupiny z mjenom Wotawa a wjesne žony ze skečemi program lětušeho babylěća. Takle mjenuja tam znajmjeńša hižo dźesać lět – dokładnje ličili to ani njejsu – swój wjesny swjedźeń. Něhdźe dźesać lět běchu jón do toho jako domchowanku swjećili, přeradźi moderatorka programa Hana Krawcowa, předsydka wjesneje rady. Jeje čłonojo swjedźeń kóžde lěto hłownje organizuja, poboku su jim wohnjowi wobornicy a młodźinski klub.