Njebjelčanska gmejna swjaty křiž restawrować a požohnować dała
Miłoćicy (HS/SN). Hnydom dwaj restawrowanej swjatej křižej je Heidenauski farar Peter Opitz zawčerawšim, njedźelu, w Miłoćicach požohnował. Nimo Bulankec swójbneho křiža bě to dalši gmejnski při puću do směra na Njebjelčicy. Něhdźe 50 lět wobhladuja Miłočenjo tónle křiž jako swój zhromadny. Bywša wobsedźerka bě jón 1960 restawrować dała, bórze na to pak zemrěła, zawostajiwši přeće, zo njebychu křiž sebi samomu přewostajili. Tomu wotpowědowaše Njebjelčanska gmejna hižo lěta 2002.
Lětsa je komuna křiž znowa restawrować dała. Hižo z dawnych časow drje koporowa třěška křiž škita. Přiwšěm je čas swoje slědy zawostajił. Prjedy hač bychu škody tak wobšěrne byli, zo křiž scyła hižo sporjedźeć njemóhli, so gmejnska rada rozsudźi jón ponowić dać. Tajkile wuměłsce hódny objekt restawrować dać wšak njemóžeš z portoweje kasy zapłaćić. Gmejna prócowaše so tuž wo spěchowanske srědki, štož pak so bohužel njeporadźi. Radźićeljo tohodla wobzamknychu, do hospodarskeho plana zapřijeć 2 000 eurow za ponowjenje.