Budyšin (ESm/SN). Sto kilometrow dołhu wysoko nabitu milinowu čaru wot milinu składowaceje klumpoweje připrawy Niederwartha nad Łobjom mjez Drježdźanami a Mišnom hač k milinarni w Hirschfeldźe tuchwilu ponowjeja. Mjeztym su twarske dźěła tež teren sewjernje Budyšina docpěli. Hižo lěta 2013 běchu wotrězk wot Lubija do Lětonja a loni wot Lětonja do Delnjeje Kiny dozhotowili. Z tuchwilnym twarskim wotrězkom pola Budyšina zwjazuja hižo dozhotowjeny dźěl milinoweje čary při přepinarni pola Schönbrunna. Sewjernje Budyšina, kaž na přikład mjez Słonej Boršću a Bórkom, su fundamenty za nowe woclowe sćežory hižo wukidane. Tu su dotal wrotowe sćežory, wobstejace z dweju padoruneju a jednoho wodoruneho dźěla, wobraz krajiny postajeli. Natwarili běchu je wokoło lěta 1926. Jednotliwe profilowe woclowe dźěle běchu tehdy na městnje z nitami zwjazali a sćežor na to w cyłku nastajili.