Personalne wudawki dale stabilne, zawodowe kóšty pak znižene

Njeswačidło (aha/SN). Za wopyt swojich dźěći w Njeswačanskej pěstowarni kaž tež w tamnišim žłobiku a horće změja starši přichodnje mjenje płaćić. Tole je Njeswačanska gmejnska rada wčera jednohłósnje wobzamknyła. Hačrunjež je financne połoženje komuny napjate, móžeše nawodnica hłowneho zarjada Liliana Wetzko rozsud wobkrućić.

Po pruwowanju lońšich ličbow pěstowarnje, kotrejež nošer je Němski čerwjeny křiž, su zwěsćili, zo drje běchu personalne a wěcne kóšty 473 000 resp. 106 000 eurow porno tamnym lětam konstantne wostali, zawodowe kóšty pak běchu so wo něšto znižili. Podźěl staršich za žłobikowe městno w Njeswačidle wučinja 23 a za pěstowarske 30 procentow. Tak nje­trjebaja woni přichodnje za swoje dźěćo, kotrež je dźewjeć hodźin w žłobiku, hižo kaž dotal 141 eurow, ale 5,27 eurow mjenje płaćić. Za pěstowarske dźěćo pomjeńši so popłatk za samsny přebywanski čas wo 3,18 eurow, za hortowe dźěćo wo nimale dwaj euraj.