W dźěłarni za zbrašenych w klóštrje Marijinej hwězdźe w Pančicach-Kukowje wotewru štwórtk kreatiwnu dźěłarnju „et labora“. Poskićić chcedźa tam wopytowarjam potom wšelake twory runje tak kaž kursy.

Pančicy-Kukow (bl/SN). Hišće so w nowym kreatiwnym wobłuku dźěłarnje za zbrašenych swj. Michała w Pančicach-Kukowje dźěła, zarumuje, rjedźi a pyši. Zajutřišim k wotewrjenju pak ma wšitko hotowe być.

Kreatiwna dźěłarnja „et labora“ njeměła so jako wobchod za dary wobhladować. Wona ma wopytowarjam rum za kreatiwne­ zhotowjenje hlinjanych tworow skićić. Zbrašeni su při tym stajnje sobu zapřijeći. „Jich twory spožčeja ideje a motiwaciju“, rozłožuje nawoda dźěłarnje swj. Michała Handrij Ošika. Runje tak móžeš sej twory cyle po swójskej předstawje tam skazać a zhotowić dać. Hižo hotowe hlinjane hornčki, wěšatka, wazy kaž tež swěčki atd. móžeš sej kupić.