Łuh 600. róčnicu wobstaća wulce swjećił
Łuh (ML/SN). Wjace hač 200 zajimcow dožiwi minjeny pjatk wječor pokazku na zańdźenosć Łuha, z kotrejž zahaji so swjedźeń k 600. róčnicy prěnjeho naspomnjenja dwurěčneje wsy w Njeswačanskej gmejnje. Studentka architektury na Drježdźanskej techniskej uniwersiće Julia Kretschmar ze wsy bě tak mjenowany časowy prud zdźěłała, z kotrymž předstaja na pjećapoł metra płoniny wažne etapy a podawki stawiznow.
We wopismje z lěta 1415 wobkrući ryćer Kašpor von Luttitz ze Zdźěrje, zo přewostaji wón Budyskemu tachantstwu poł hriwny danje, kotruž měješe jemu bur z Lugka/Łuha płaćić. To je zdobom prěnje pisomne naspomnjenje wsy. Serbski pochad a wuznam wjesneho mjena kaž tež zasydlenje Serbow so na spočatku časoweho pruda jewja. Hakle 1550 mějachu we Łuze knježi dwór zemjana. Mjez jednotliwymi knježkami a wobsydnikami wsy bě tež w 19. lětstotku Serbam derje zmysleny baron Egon Heinrich Gustav von Schönberg, spěchowar serbskeho pismowstwa a čłon Serbskeho lutherskeho knihowneho towarstwa.