Budyšin (SN). Nowy plakat „Serbske stawizny w 160 wobrazach“ chcedźa jutře, srjedu, w 19 hodź. w Budyskim Serbskim muzeju zjawnosći předstajić. W 160 wobrazach a krótkich tekstach podawa wón přehlad wo faktach serbskich kulturnych stawiznow w Hornjej a Delnjej Łužicy. Wot prěnjeho pisomneho naspomnjenja Serbow w chronice Fredegara wokoło lěta 630 hač k stotej róčnicy załoženja Domowiny w lěće 2012 su stawizny Serbow zwobraznjene. Historiske dokumenty a objekty­ steja jako symbol za wažne mězniki stawiznow. Awtoraj dr. Hans Mirtschin a Ralf Reimann – wonaj staj tež awtoraj­ plakata k stawiznam Budyšina – staj nimo znatych dokumentow a wo­brazow tež nowy material wuzwoliłoj.