Njeswačidło (AK/SN). Stawizny oldtimerow, kak derje su hladane a kak funguja – bě sobotu najwažniša naležnosć ludźom, kotřiž dožiwichu wobdźělnikow 3. rallyeje Elbflorenz. 154 historiskich jězdźidłow bě dopołdnja w Drježdźanach startowało a jědźeše po 265 kilometrach nimo Łužiskeho koła přez Zły Komorow, Lejno, Łaz, Delni Wujězd, Manjow, Njeswačidło, Kamjenc a Połčnicu wróćo do Drježdźan.
„Wobradźamy přihladowarjam wjeselo, wotkrywamy sej rjane krajiny a ludźi po puću zapřijimamy. To nas motiwuje“, rjekny organizator Markus Hendel. Wjace hač sto rjadowarjow, sudnikow a pomocnikow bě wobdźělenych. Hinak hač při druhich rallyejach njebě spěšnosć rozsudna. Skerje prašane bě, kak so orientuješ, kak z jězdźidłom wobchadźeš, kak wobstajnje jězdźiš a prawu čaru namakaš. Na wjacorych městnach měrjachu čas, mjez druhim při Třižonjanskim jězoru, w Njeswačanskim hrodowym parku a na Kamjenskim torhošću.