Wyši měšćanosta wobara so přećiwo tukanjam w interneće
Běła Woda (AK/SN). Swój koncept decentralneho zaměstnjenja ćěkancow, předewšěm swójbow, chce město Běła Woda tež přichodnje zwoprawdźić. Tole podšmórny wyši měšćanosta Torsten Pötzsch (Klartext) wčera na posedźenju měšćanskeje rady. Tuchwilu bydli 86 požadarjow azyla, mjez nimi połsta dźěći, w dohromady 18 bydlenjach. „Hač do kónca lěta přewostaji bydlenjotwarska towaršnosć dalše 15 bydlenjow. Prjedy hač ćěkancy do nich zaćahnu, chcemy z wobydlerjemi zhromadźizny přewjesć“, připowědźi Torsten Pötzsch. Po jeho słowach maja w měsće derje wothłosowanu pomocnu syć, w kotrejž wosady, towarstwa, město a policija hromadźe dźěłaja. Njedawno su někotři ćěkancy za zajimcow warili. Młody požadar azyla je tele dny samo abituru złožił a chce rady w měsće wostać, rysowaše Pötzsch přikładaj integracije. Na tamnym boku so wón starosći, zo za wosom dźěći ćěkancow městna w šulach pobrachuja. Město tuž doraznje na zamołwite instancy apeluje, zo by so winowatosć do-šule-chodźenja w Běłej Wodźe dodźeržała.