Zo móhli dobrowólni wobornicy stajnje a wšudźe hašeć a pomhać, dyrbja derje wukubłani być, čehoždla často zwučuja. Někotři z nich činja to přichodne dny we wosebitym kontejneru, w kotrymž hodźa so wšelake družiny wohenja simulować.

Kamjenc (HS/SN). „Fire training“ je napisane na módrym kontejneru, kiž steji wot wčerawšeho na terenje Kamjenskeho wohnjowoborneho techniskeho centruma. K dwojim durjam wjedźe mały schód, dalši zachod je na třěše, naboku su wjacore mjeńše wokna. Nutřka hodźa so wšelake družiny wohenja napodobnjeć, po měnjenju fachowcow jara realistisce. Mjez druhim woheń w kuchni, tak mjenowany flash over, potajkim hdyž so płun pod wjerchom pali, woheń w milinowym kamorje a dalše. Dohromady dźewjeć scenarijow móža w 40 kwadratnych metrow wulkej zwučowanskej připrawje simulować. Energijowy zastaraćel ENSO připrawu hižo šěsć lět financuje.