Wulki poskitk a słónčne wjedro wabještej wčera na Slepjanske kermušne wiki. A syły wćipnych ludźi přichwatachu z mnohimi přećemi.
Slepo (JoS/SN). Na njedźelnych kermušnych wikach Serbskeho kulturneho centruma Slepo chcychu wopytowarjam njewšědny serwis poskićić. Chorosće dla pak njemóžeše so pomologa dr. Hilmar Schwärzel z Münchebergskeho Leibnizoweho centruma agrarnoratarskeho slědźenja wobdźělić.
Dokal nětko z jabłukami, kotrež běchu wopytowarjo wot doma sobu přinjesli? Chcychu dźě něšto wo pochadźe a stawiznach swojich płodow zhonić. Při pólnych pućikach a na zahrodach wšak hišće mnohe stare jabłučiny wuhladamy. A runje jich płody su wosebje słódne.
Organizatorojo wikow mějachu rozrisanje, kotrež wšitkich spokoji: Městno na stólcu zabra Sylwija Panošina, kotraž jabłuka do měškow tykaše a je z mjenom wopytowarjow popisa. Měški nastupja nětko jězbu k wuhódnoćenju do Müncheberga k pomoloze dr. Schwärzelej. Zajimcow wón potom z mejlku wo pochadźe a stawiznach jabłukow informuje.