Křiže dokładnje přeslědźiła

srjeda, 28. oktobera 2015
artikl hódnoćić
(0 )
Mjez wobdźělnikami zetkanja chronikarjow běchu wčera dr. Beno Wałda, Jakub Šołta  a Měrćin Bulank (wotprawa).  Foto: Alfons Handrik Mjez wobdźělnikami zetkanja chronikarjow běchu wčera dr. Beno Wałda, Jakub Šołta a Měrćin Bulank (wotprawa). Foto: Alfons Handrik

Chrósćicy (aha/SN). Před dźesać lětami je sej předsydstwo župy „Michał Hórnik“ do swojeho lětneho dźěłoweho plana zapisało, přewjesć rozmołwu z wjesnymi chronikarjemi a znajerjemi wjesnych stawiznow­. Wot toho časa organizuja z nimi kóžde lěto prawidłownu wuměnu nazhonjenjow. Na wčerawše zetkanje w Chróšćanskim Krawčikec hosćencu móžeše ­mě­stožupanka Zala Cyžowa znowa­ horstku agilnych zběraćelow historiskich dokumentow witać. Wobšěrnje předstaji na zetkanju Trudla Kurin­gowa swoje akribiske slědźerske dźěło na temu ­„Nabožne narodne pomniki we Wotrowskej wo­sadźe“. Před lětomaj su so w předsyd­stwje dojednali a rozsudźili, zo pře­wozmje župa nošerstwo nad projektom. Kaž sej akademija w Freibergu žada, je Kuringowa, a to dwurěčnje, wšitke žadane komponenty, znosyła. Wone sahaja wot wopisanja křižow, modlerskich stołpow a kapałkow přez dokładne wuměrjenje wulkosće a šěrokosće pomnika hač k zapisanym lětoličbam a hrónčkam. Hačrunjež njeje za archiwowanje trjeba podać dokładne stawizniske wopisanje objekta, měješe to awtorka přiwšěm za wažne.

To rěkaše, zo je so z kóždym křižom dokładnje zabě­rała a za to wjele časa za naprašowanja a rozmołwy woprowała.

W knižce w formaće A 4 rozłožuje Trudla Kuringowa na wjac hač 100 stronach dwaceći křižow a nabožnych pomnikow Wotrowa a 23 dalšich na wsach Wotrowskeje wosady. Skrótka podawa wona zawodnje ke kóždej wsy stawizny, na čož jednotliwe pomniki a jich kulturnostawiznisku hódnotu dokładnje wopisuje. Tak tež zhonimy, štó je křiž stajił, a móžemy na jeho swójbne stawizny zhladować.

Zhromadnje z Thomasom Kleinstü­ckom, zamołwitym za zastaranje šulow wokrjesa za medije, je Kuringowa dwě DVDji zhotowiła. Na 200 fotach z tekstami a wubranej hudźbu je wobšěrnu dokumentaciju wo křižach stworiła.

Přitomni wčera z chwalbu njelutowachu. Tak hódnoćeše Pawoł Rota, „zo njeje tajke dźěło po swjatoku připódla sčinjene“. Mjeztym zaběra so Trudla Kuringowa ze swjatymi křižemi w Pěskecach.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND