Budyšin (SN/JK). W přitomnosći wosobinow zjawneho a politiskeho žiwjenja Budyskeho wokrjesa a Sakskeje su dźensa dopołdnja třeći twarski wotrězk nowotwara Budyskeje chorownje Hornjołužiskich klinikow tzwr wjatočnje přepodali. Cyłkownje nałoženych 42 milionow eurow (z toho 25 milionow z fondsa Swobodneho stata Sakskeje) je po słowach jednaćela Reinera E. Rogowskeho na dobro pacientow kaž tež medicinskeho a zastaranskeho personala daloko přez mjezy wokrjesa znateje chorownje. „Dźěłamy za to, zo su pacienća a wšitcy medicinskeje pomocy potrěbni stajnje derje zastarani“, wón wuzběhny.
Swoje wjeselo a dźakownosć za nowe dźěłowe wuměnjenja zwurazništaj šeflěkarka noweje žonjaceje a porodneje kliniki dr. Petra Bießlich kaž tež šeflěkar dźěćaceje a młodźinskeje kliniki dr. Ulf Winkler. We woběmaj klinikomaj běchu minjene lěta načasne medicinske móžnosće parowali. Z nowotwarom móža nětko pacientow, wosebje młode maćerje, dźěći a młodostnych z načasnymi naprawami pod přijomnymi wuměnjenjemi zastarać, lěkować a hladać.