Projekt Njebjesa podłu Jaworskeje rěčki předstajili
Miłoćicy (HS/SN). Dźesać lět je trało wot ideje za renaturowanje łučneje krajiny podłu Jaworskeje rěčki w Njebjelčanskej gmejnje hač k předstajenju projekta Njebjesa. Gmejnska rada je k tomu wčera wobydlerjow Miłoćic a Njebjelčic přeprosyła. Mjez woběmaj wsomaj je projekt hłownje zapołoženy.
W nadawku gmejnskeje rady zhotowjenu studiju rozłoži Johannes Heimrath, kiž je Njebjelčansku gmejnu tež hižo w druhich ekologiskich a socialnych prašenjach poradźował. Kaž wón wčera rjekny, běchu jemu při jeho prěnim wopyće w gmejnje niwowa krajina podłu Jaworskeje rěčki powšitkownje a wosebje Miłočanska žaba kaž tež areal při Miłočanskej skale napadnyli. Žaba kaž tež skała stej wosebitej městnje, wo kotrymajž běchu hižo lěta 2007 w dźěłarničce rěčeli. Wulku ličbu tehdy zezběranych pokiwow je Heimrath nětko do swojeho 22 stron wopřijaceho koncepta zapřijał.