Měšćanska rada přidatnu nakupowansku njedźelu jako pospyt schwaliła

Budyšin (CK/SN). Z přemóžacej wjetšinu hłosow je Budyska měšćanska rada wčera wobzamknyła, zo smědźa wobchody w měsće njedźelu, 6. decembra, wot 12 do 18 hodź. wočinić. Radźićeljo wotpowědowachu tak próstwje nimale sto wikowarjow. Wobkrućili běchu namjet z tym, zo skónči so samsny dźeń akcija „Sćěhuj hwězdu“ we wobłuku 632. Wjacławskich wikow. Na to wočakuja hač do 2 000 přidatnych wopytowarjow. Tule šansu wikowarjo skomdźić nochcedźa.