Serbska rozprawa před měšćanskim parlamentom w Choćebuzu
Choćebuz (HA/SN). Nowelěrowany braniborski Serbski zakoń je jara dobry zakład za dalšu wuspěšnu mjeńšinowu politiku kaž tež za dalše spěchowanje serbskeje rěče a kultury tež w měsće Choćebuzu. Tole wustaji społnomócnjena za naležnosće Serbow w Choćebuskim měšćanskim zarjadnistwje Ana Kosacojc-Kozelowa wčera na posedźenju parlamenta delnjołužiskeje metropole. Kaž na kóncu kóždeho lěta poda wona rozprawu wo swojim dźěle a wo aktualnym serbskim połoženju w měsće.