Radźićeljo chcedźa smjerd a wobchad redukować
Róžant (aha/SN). Ze saněrowanjom a powjetšenjom Ralbičanskeje kormjernje swini mějachu so čłonojo gmejnskeje rady Ralbicy-Róžant na swojim wčerawšim posedźenju znowa zaběrać. Hačrunjež běchu woni planowane předewzaće jednaćela kormjernje Hagena Roßmanna zas a zaso wotpokazowali, ma Budyski krajnoradny zarjad předwidźane twarske podłožki nanajpozdźišo klětu w januaru wupołožić.
Spočatk lěta 2014 bě nawodnistwo ratarskeho předewzaća próstwu k nastajenju wobtwarjenskeho plana zapodało. Gmejnska rada je loni w aprylu wo tym wuradźowała a předwidźane změny wotpokazała. Spočatk meje tohole lěta so radźićeljo z planowanymi podłožkami wospjet zaběrachu. Ratarske předewzaće chce na městnje třoch starych chlěwow tři nowe natwarić. Tamne štyri maja so modernizować a tak wuhotować, zo su imisiske předpisy dodźeržane. Dale natwarja juchowej jamje, dosahacej za mnóstwo juchi dźewjeć měsacow. Tuchwilu plahuja w Ralbicach 6 900 swini, po ponowjenju a powjetšenju ma kapacita na 11 400 skoćatow rozrosć.