W Carla Anwandterowej zakładnej šuli 25 dźěći delnjoserbšćinu wuknje
Wot lěta 2009 je Werner Suchner (njestronjan) měšćanosty Kalawy. „Smy strowe sydlišćo z atraktiwnym a rjanym nutřkownym městom“, praji 57lětny nan třoch dźěći. Z młódšeje generacije drje dźensa lědma hišće něchtó wě, zo je Kalawa „ródne město“ po cyłym swěće znatych Kalawskich žortow. Jedyn z nich mi měšćanosta hnydom powěda: „Čehodla chodźu w nohajcach po radnicy? – Nó, zo njebychu mi ničo do čriji sunyć móhli.“ Přećelny muž je po powołanju inženjer za powěsćowu techniku. „Kalawski žort“ pak njeje, zo chce něhdźe 8 000 wobydlerjow wopřijaca komuna serbskemu sydlenskemu rumej přistupić. Wjetšina měšćanskich radźićelow je tydźenja na posedźenju měšćanskeje rady tomu přihłosowała. „Je derje, zo so na swoje serbske korjenje dopominamy, byrnjež tu hižo wjele serbskeho njebyło“, Werner Suchner měni. A prawdźepodobnje skoro ničo w Kalawje na serbskosć njepokazuje. Ćim bóle ma so wuzběhnyć, zo w zakładnej šuli Carla Anwandtera tuchwilu 25 holcow a hólcow delnjoserbšćinu wuknje.
