Planowanske podłožki za 15 nowych domow nětko předleža

Róžant (AR/SN). Wažne rozsudy na dobro młodeje generacije stejachu wčera na poslednim lětušim posedźenju gmejnskeje rady Ralbicy-Róžant w srjedźišću. Radźićeljo wobzamknychu wob­twarjenski plan „Sernjany-zapadny dźěl wsy“. Na kromje Sernjan do směra na Róžant móže bórze 15 nowych domskich nastać. Za wšitke płoniny maja dawno zajimcow. Nimale cyłe lěto pak dyrbješe gmejna na trěbnych wustawkach dźěłać. Po wospjetnych změnach na žadanja wjacorych zarjadow a institucijow předleža skónčnje dotal pobrachowace přihłosowace planowanske podłožki. Sobudźěłaćerka Budyskeho krajneho architekturneho běrowa Panse Elisa Menzel tuž sobustawam gmejnskeje rady poruči, twarske wustawki ­wobzamknyć. To so tež bjez dalšeje ­diskusije jednohłósnje sta. Nětko předpołoža dokument Budyskemu krajnoradnemu zarjadej k wobkrućenju – w tym padźe jedna so jenož hišće wo ­formalitu.