Jaseńca (LZ/SN). Po tym zo běchu młodostni srjedź nazymnika teren wokoło Jasčanskeho kulturneho domu wurje­dźili a na mnohich wječorach někotři w „Bjesadźe“ nowu hru nazwučowali, móžachu wjesnjenjo sobotu tradicionalnu adwentničku woswjećić. Młodźi a stari běchu połni wočakowanja přichwatali. Při ćmičkanju zawjeselichu dujerjo Njeswačanskeje wosady přitomnych z dohodownymi a zymskimi melodijemi. Je to hižo dlěje hač 20 lět, zo dujerjo w adwenće do Jaseńcy přijědu. W 1990tych lětach běchu na nawsy hudźili. Po dotwarje kulturneho domu w lěće 2000 činja to nětko w kulturnej rumnosći.