Štož maja we wjacorych dalšich wsach tež, chcychu sej rady tohorunja w Róžeńće wuhotować: adwentne wiki. To pak po wšěm zdaću scyła tak jednore njeje, kaž so při přihotach pokaza.
Róžant (jh/SN). Hižo loni w hodowniku běchu so Róžeńčanske młode swójby a tamniša młodźina na 1. adwentne wiki dojednali, dokelž tajke druhdźe kaž w Konjecach, Nowej Wjesce abo w Njebjelčicach tež maja. Hač do lětušeho prěnjeho adwenta pak docyła tak prawje jasne njebě, hač wiki scyła budu. Prawy organizator a wuhotowar hišće pobrachowaše. Nichtó nochcyše sej kłobuk stajić.
Najnjekomplikowanišo widźachu to někotre Róžeńčanske dźěći, kotrež chodźa přewažnje w Ralbicach do zakładneje a wyšeje šule. Tam běchu tydźenja podobne wiki wuhotowali. Njewědźo wo tójšto přihotach su so same starali a nadawki rozdźělili – susodam, šulskim přećelam, staršim, dźědam abo wowkam a dalšim. Pola domownika Ralbičanskeje šule Tomaša Langi wobstarachu sej předawanske budki, nanojo a maćerje dyrbjachu so wo zastaranje starać. Róžeńčanska wjesna rada přewostaji tepjenu wjesnu rumnosć.