Nuknica (SN/MWj). Na cyle hinaše a za někotrehožkuli chětro njezwučene wašnje hodownym swjatym dnjam wuklinčeć dali su wčera w Nuknicy. Tamniše towarstwo Barakka je štwórty raz punkrock-feverowy koncert wuhotowało a předewšěm tón młódši publikum přeprosyło, kotryž měješe po cunich hodownych zynkach minjenych dnjow lóšt na trochu twjerdšu hudźbu. Zo w Nuknicy časćišo rady na metalowu a podobnu hudźbu słuchaja, wšak je znate. Punk pak so tak prawje do druhich programow njehodźi, rozłoži sobuorganizator Měrćin Wjenk. Su sej tuž njedźelu po hodownych swjatych dnjach za tajki wosebity koncert wupytali.
Po tym zo su tele zarjadowanje loni bjez kapały přewjedli, su sej nětko hnydom tři přeprosyli. Tak zahrachu Big Trunk z Budyšina, Cháska z čěskeho Noveho Bora a Jonny Kurts vs. Hank the Tank ze Zhorjelca. Něhdźe 170 młódšich ludźi z dwurěčneje wokoliny, ale tež ze zdalenišich kónčin sej do Nuknicy dojědźe a da so wot tohole trochu specielneho hudźbneho stila wobkuzłać. Požadarjam azyla a ćěkancam běchu organizatorojo darmotny zastup poskićili.
