Po pospyće zelena swěca za trajne rozrisanje na Budyskim křižowanišću
Budyšin (CK/SN). Z prowizorija kružneho wobchada při Budyskim Mosće měra ma so trajna připrawa stać. Tole su měšćanscy radźićeljo na swojim zašłym posedźenju wobzamknyli. We wobłuku wobchadneho pospyta běchu kružny wobchad w aprylu 2015 připrawili, zo móhli jeho wukonliwosć a akceptancu mjez šoferami zwěsćić. Kaž při wuhódnoćenju wuzběhnychu, drje so awta do směra na centrum wróćo kopja, ale jenož w časach wulkeho wobchada. Rynki čakacych awtow pak so spěšnišo rozpušćeja hač při rjadowanju z amplu. Po fazy zwučenja žněje kružny wobchad mjeztym připóznaće, tež mjez wobydlerjemi w susodstwje. Kritiske přispomnjenja nastupaja jeničce přechody za pěškow. Tele pokiwy chcedźa při planowanju trajneho kružneho wobchada wobkedźbować. Kaž měšćanski radźićel Heiner Schleppers (CDU) přispomni, „njebě při žanym wjetšim dróhotwarskim projekće w Budyšinje telko přihłosowarjow“.