Kamjenc (SN/MWj). Trochu pozdźišo hač w Budyšinje a Biskopicach je so prěnje dźěćo lěta 2016 w Kamjenskej chorowni maltezow swj. Jana hakle 4. januara w 9.06 hodź. narodźiło. Mała Jolene wažeše 4 150 gramow a bě 53 centimetrow wulka. Staršej z Kinsporka běštaj zbožownaj, swoje druhe dźěćo strowe w rukomaj dźeržeć směć, a běštaj zdobom tróšku hordaj, zo je jeju dźowka prěnje dźěćo noweho lěta w Lessingowym měsće. To zdźěla zamołwita za zjawnostne dźěło chorownje Ines Eifler.

W porodnej klinice pak mějachu hižo něšto dnjow do toho dalšu přičinu k wjeselu. 29. decembra bě tam 500. dźěćo lěta 2015 na swět přišło. Dohromady witachu loni 507 nowonarodźenych. Z nich bě 236 holčkow a 271 hólčkow. Tři žony porodźichu dwójniki. Najwjetše a najćeše dźěćko při porodźe bě 2. meje 59 centimetrow wulke a 4 820 gramow ćežke. Najwoblubowanišej předmjenje běštej loni Marie (wosom razow) a Matteo (tohorunja wosom razow). Na dalšich městnach slěduja pola holcow Frieda (7) a Hanna (7) a pola hólcow Ben (7) a Luca (6).