Po naprašowanju z tak mjenowanej łužiskej app w minjenych tydźenjach su najwoblubowaniše hosćency Hornjeje Łužicy zwěsćili. Mjez prěnimi dwanaće je korčma „Häuslerschänke“ w Rachlowje pola Kulowa direktnje při hłownej dróze. Tam su tež hižo serbske towarstwa a skupiny witali.
Rachlow (SN/MWj). Frank Seeliger so wjeseli. Po tym zo je jeho dom „Häuslerschänke“ při lońšim pytanju za najwoblubowanišim hornjołužiskim hosćencom pjate městno wobsadźił, je wón lětsa mjez prěnimi dwanaće. Tež hdyž wón hakle w měrcu dokładne městno zhoni, je korčmar spokojom. „Mi je to prosće wjeselo, so na tajkim naprašowanju sobu wobdźělić. A wězo wuslědk mi a mojim sobudźěłaćerjam wobkruća, zo porjadne dźěło wukonjamy“, 49lětny hordźe powěda.