Brěžki (aha/SN). 25. raz podachu so Brěžčanske žony minjenu sobotu, kaž stajnje tydźeń do prěnjeho Kulowskeho kapičkoweho wječora, na camprowanje. Lětsa bě darniwosć něhdźe 180 tam bydlacych ludźi wosebje prašana. Běchu dźě jenož něšto hodźin do toho hižo hwězdni spěwarjo we wsy po puću. Brěžčanske žony maja so wot spočatka hajenja tohole nałožka po tradiciji, zo pokazuja ze swojimi kostimami na to, kak běchu lěta do toho pisanosć wulkeho Kulowskeho karnewaloweho ćaha wobohaćili. Tak sy tam sobotu wuhladał mjez druhim lawa a bože słónčko. Swjatojanska muška dopominaše na wobraz Brěžčankow na lońšich póstnicach w Kulowje.