Pjenjezy su na posedźenjach gmejnskich radow stajnje zaso wulka tema, wosebje tam, hdźež jich přewjele nimaja. Rakečanska gmejna swoje financy tuchwilu konsoliduje.

Rakecy (AR/SN). We wobłuku wčerawšeje zhromadźizny Rakečanskeje gmejskeje rady informowaše tamniša komornica Franziska Pfeiffer wo aktualnej pjenježnej situaciji komuny. Tučasnje je wona ze 197 000 eurami likwidna. Po něšto lětach z negatiwnymi ličbami njetrjebaja so tuž wjace na kasowe kredity złožować. Hospodarska konsolidacija gmejny, napołožena wot krajnoradneho zarjada, tak wuspěšnje dale dźe. Njewobsteji pak žana přičina, euforiscy być, warnowaše wjesnjanosta Swen Nowotny (CDU). Za přichod maja runje tak kaž we wšitkich gmejnach ličić ze spadowacymi klučowymi připokazanjemi kraja a ze stupacymi wotedawkami wokrjesej.