Runje tak kaž přewjeduja Domowinske skupiny, kulturne ćělesa a towarstwa spočatk lěta swoju hłownu zhromadźiznu, činja to tež wohnjowe wobory, kaž tele dny Konječansko-Šunowska.

Konjecy (DG/SN). Kameradojo Konječan-Šunowskeje wohnjoweje wobory zetkachu so minjeny pjatk w Konječanskej burskej stwě k hłownej zhromadźiznje. W srjedźišću stejachu zhladowanje na minjene lěto kaž tež wuhlady do přichoda. Na zhromadźiznu su sej nawodu gmejnskeje wohnjoweje wobory Achima Měrćinka a wjesnjanostu Hubertusa Ryćerja (CDU) přeprosyli.

Ze 34 aktiwnymi wobornikami a sydom staršimi čłonami je Konječansko-Šunowska wohnjowa wobora derje wobsadźena. Na přerěznu starobu 36,2 lět mjez aktiwnymi wobornikami móža hordźi być. Tak móžachu loni dweju noweju do kruha aktiwnych witać. Dohromady sydom króć dyrbjachu na pomoc chwatać. Zo bychu na tajke nuzowe pady derje přihotowani byli, dźiwaja wosebje na wotpowědne wukubłanje. Dohromady přewjedźechu loni 14 tajkich słužbow. K tomu přińdźechu wuspěšne dalekubłanja třoch młodych kameradow.