Hnujace dopomnjenki

wutora, 26. januara 2016
artikl hódnoćić
(0 )
W 10. lětniku Wojerowskeho Johanneuma je Justin Sonder (srjedźa) wo swojich dopomnjenkach na kacet Auschwitz powědał.  Foto: Andreas Kirschke W 10. lětniku Wojerowskeho Johanneuma je Justin Sonder (srjedźa) wo swojich dopomnjenkach na kacet Auschwitz powědał. Foto: Andreas Kirschke

W projekće „Přećiwo zabyću“ so šulerjo z nacionalsocializmom zaběrali

Wojerecy (AK/SN). Přežiwił je Justin Sonder jenož dźakowano připadej, zbožu a solidariće. W nocy na 3. měrc 1943 steješe wón jako 17lětny w šćipatej zymje při rampje koncentraciskeho lěhwa Ausch­witz-Birkenau. „17 selekcijow sym pozdźišo přežiwił. Dwě běštej jara dramatiskej“, powědaše 90lětny Kamjeničan tele dny rjadowni 10 c Wojerowskeho gymnazija Johanneum. Po pozdźišim smjertnym pochodźe z kaceta Flossenbürg jeho ameriscy wojacy 23. apryla 1945 wuswobodźichu. Wón słuša k poslednim žiwym swědkam Auschwitza. Dlěši čas hižo podpěruje Sonder we Wojerecach projekt „Přećiwo zabyću“.

Regionalne městno za kubłanje, demokratiju a žiwjenske perspektiwy (RAA) je projekt před 20 lětami do žiwjenja zwołało. Kóžde lěto docpěwa z nim ně­hdźe 350 šulerjow na gymnazijach a wyšich šulach. „Rozestajeć so z časom nacionalsocializma je wulce aktualne a nuznje trjeba. Runje w socialnych syćach stej hida a šćuwańca daloko rozšěrjenej“, potwjerdźi Helga Nikich, předsydka Wojerowskeho RAA. „Přičina njeje žołma ćěkancow, ale zmyslenje mnohich ludźi.“

Swědcy časa su wažny wobstatk projekta, dokelž woni šulerjam awtentisce wo swojich struchłych dožiwjenjach powědaja a šulerjo móža so jich direktnje prašeć. Za to so jim Wojerowski socialny měšćanosta Thomas Delling (SPD) nětko dźakowaše. Po jeho słowach je projekt minjene lěta wuskutkował, zo młodźi ludźo wo přičinach nacionalsocializma wědomišo rozmysluja. Runje to chce tež Justin Sonder docpěć. „Wy nimaće žanu winu. Ale maće zamołwitosć, zo so wójna a holocaust nihdy njewospjetujetej“, zwurazni 90lětny Kamjeničan w rozmołwje ze šulerjemi Johanneuma. Jeho wotewrjene wašnje je w holcach a hólcach hłuboki zaćišć zawostajiło. W nim woni takrjec spóznachu, kak móžeš sej tež w najhóršich wobstejnosćach čłowjeskosć a sylnu wolu wobchować.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND