Inwestuja do šulow a dróhow

štwórtk, 28. januara 2016
artikl hódnoćić
(0 )

Budyscy měšćanscy radźićeljo su so na swojim wčerawšim posedźenju z hospodarskim planom 2016 zaběrali. Tón skići městu wjace pjenježnych móžnosćow hač w druhich komunach.

Budyšin (CK/SN). Něhdźe 7,4 miliony eurow chce město Budyšin lětsa inwestować. Tole předwidźi naćisk noweho hospodarskeho plana, kiž je financny měšćanosta dr. Robert Böhmer po štyrjoch měsacach w zastojnstwje wčera měšćanskim radźićelam předstajił. Po nim chcedźa dalše dróhi sporjadkować a dwě zakładnej šuli kaž tež rozwalinu mnišeje cyrkwje saněrować. Dwaj milionaj eurow stej za lěpše wuhotowanje šulow předwidźanej. Nimale třećina dohromady 69 milionow eurow wopřijaceho etata su personalne wudawki. Něhdźe 14 milionow eurow přewostaja za hladanje dźěći, połojcu z toho jako přiražku swobodnym nošerjam. Nimo toho ma město hač do kónca lěta bjez dołha być. Móžno pak je to wšitko jenož, dokelž ma Budyšin přirunujo z druhimi komunami „wjace hač přikładne wuměnjenja“. Tak móžachu w zašłosći financny dobytk nadźěłać. Tón wuchadźa ze zlutniweho hospodarjenja, ale tež z toho, zo planowane předewzaća hišće zahajili njejsu, rozłoži dr. Robert Böhmer. Nimo toho wočakuja lětsa wjace dochodow z dawkow, štož wotbłyšćuje dobre hospodarske wuwiće.

Zo ma Budyšin wjace pjenježnych móžnosćow, je porno druhim komunam lěpšina. To pak zawjedźe tež k darowanju. Tohodla wabi Böhmer dale za „ro­zumne hospodarjenje“. Wuskutkować so budźe, zo město žane popłatki za wutwar pućow njezběra. Böhmer pak tež žane dalše móžnosće dochodow njewidźi. Hospodarstwo drje je na wyšinje konjunktury. Tomu pak slěduje kaž zwjetša po wosom lětach čas stagnacije. „Ale tež potom chcemy socialnje fungowace město zachować“, Böhmer potwjerdźi.

Ležownostny dawk lětsa w sprjewinym měsće njezwyša. Po słowach wyšeho měšćanosty Alexandera Ahrensa (njestronjan) pak dyrbja wo tym perspektiwisce rozmyslować. Radźićel Mike Hauschild (FDP) porokowaše, zo chcychu wšitcy třo nowi měšćanosća na čole radnicy z nowym etatom swójske ćežišća postajić. Tajke pak njemóže spóznać.

wozjewjene w: Lokalka
Prošu přizjewće so, chceće-li komentar podać

nawěšk

SERBSKE NOWINY podpěruja:

Novi Sad – kulturna stolica Europy

nowostki LND