W Kinsporku swjeća lětsa 44. karnewalowu sezonu. Princowski por staj tam Johannes I. a jeho luboznosć Fidelis I. Po swójbnym mjenje rěkataj lěta 2007 zmandźelenaj Lindnerec.
Kinspork (SN/mwe). 35. króć poćahnu sobotu, 6. februara, wot 14 hodź. karnewalisća po zapadołužiskim Kinsporku. To budźe zaso wulki spektakl, kotryž kóžde lěto tysacy přihladowarjow do městačka ze 4 400 wobydlerjemi wabi. Wšako so nimo Kinsporskeho karnewaloweho kluba tež póstniske skupiny z wokolnych wsow kaž Gräfenhaina, Röhrsdorfa, Schmorkauwa, Weißbacha abo Großnaundorfa hižo měsacy na tónle wulki podawk přihotuja. W znajmjeńša 30 wobrazach chcedźa tež woni w pisanych kostimach regionalnu politiku šwikać a na njedostatki pokazać.