Dźěwin (AK/SN). Šěsć razow su loni Dźěwinsku dobrowólnu wohnjowu woboru na hašenje abo za technisku pomoc wołali. Wobdźělenje na jednotliwych zasadźenjach bě přerěznje dobre. Tole podšmórny wjesnjanosta Helmut Krawc (SPD) na wčerawšim posedźenju gmejnskeje rady. W swojej rozprawje poćahowaše so wón na njedawnu hłownu zhromadźiznu wo- hnjowych wobornikow, kotruž běchu woni w januaru přewjedli.

„Wuzběhnyć měło so dobre dźěło z dorostom. Hrajkajo so dźěći a młodostni skutkowanju we wohnjowej woborje zbližeja“, Helmut Krawc rozłoži. W Dźěwinje maja dźěćacu wohnjowobornu skupinu ze sydom dźěćimi w starobje pjeć do sydom lět. Młodźinska wohnjowa wobora ma sydom čłonow w starobje wosom do 18 lět. Wo dorostowe dźěło staraja so Constanze Krawc, Juliane Hille, Kathleen Reimann a Carola Jentsch. Po sło­wach wjesnjanosty je dźěćaca wo­h­njowa wobora po wšej Sakskej jónkrótna. Młodźinsku skupinu drje maja mnohe wobory, ale dźěći w zakładnošulskej starobje poněčim do dźěła wobory zapřijeć, to pyta swojeho runjeća.