Wjele čitarjow tež ze wsow sej w Kamjencu knihi wupožča

Kamjenc (SN/mwe). Wjednica Kamjenskeje měšćanskeje Lessingoweje biblioteki Marion Kutter je sej wěsta, zo knihownja tež přichodnje wjele młódšich a staršich čitarjow přiwabi. Ze statistiki domu, kotryž přisłuša jako wokrjesna wudospołnjenska biblioteka Budyskej měšćanskej bibliotece, wuchadźa, zo su ju zajimcy loni něhdźe 40 000 króć wopytali. Zaměstnjenych je tam něhdźe 33 000 medijow za kubłanje, wólny čas a zabawu. Kóždy třeći titl bě po statistice wjace hač trójce wupožčeny. Za tym chowa so nahladna suma 120 350 medijow.