Kubšicy (CK/SN). Gmejna Kubšicy chce swojim wohnjowym woboram za 25 000 eurow nowu techniku za dychanski škit kupić. To je gmejnska rada wčera wječor jednohłósnje wobzamknyła. „Technika je nuznje trěbna“, komornica Sandra Reuß wuzběhny. Jedna přičina je, zo su lědma hišće narunanske dźěle k dispoziciji. Na tamnej stronje je hospodarsce zmysłapołnišo, staru techniku narunać. Gmejnske zarjadnistwo je tuž namjetowało, hnydom wšitke wjesne wobory z nowej techniku za dychanski škit wuhotować. Něhdźe połojcu wudawkow móže Budyski wokrjes spěchować. Za zapodaće próstwy bě wčerawše wobzamknjenje gmejnskeje rady trěbne. Projekt budźe wobstatk lětušeho inwesticiskeho programa komuny. Hač do apryla chcedźa nowu techniku kupić.