Kulow wostanje domoródnym kaž tež wobydlerjam zwonka města atraktiwny. Po intensiwnych prócowanjach komuny­ móža dalše swójby w štwórći Při třělnišću swoje domske natwarić.

Kulow (AK/SN). „Smy wjeseli a dźakowni, zo je so nošer namakał, kotryž 3. twarski wotrězk za bydlenske sydlišćo Při třělnišću wotkryje. Tónle nošer je fachowje kaž tež hospodarsce k tomu kmany“, podšmórny měšćanosta Markus Posch (CDU) wčera na wurjadnym posedźenju Kulowskeje měšćanskeje rady. Do toho běštaj techniski a zarjadniski wuběrk zhromadnje intensiwnje wuradźowałoj. „Smy dołho diskutowali“, je měšćanski radźićel Mathias Kockert (CDU) projekt zjimał.

1. junija 2016 chcedźa 3. twarski wotrězk wotkrywać započeć. Nanajpozdźišo hač do lěta 2017 měło bydlenske sydlišćo krok po kroku wobtwarjene być. Wone leži do směra na Salow hač ke křižowanišću njedaloko něhdyšeho dwórnišća. 41 twarnišćow dohromady je předwidźanych. Dotal předleži 28 přizjewjenjow.