Nalětnje kwětki pod tołstym sněhom – ale nic dołho

Budyšin (SN/MWj). Tajkile wobraz, kaž jón dźensa rano wuhladachmy, bychmy sej patoržicu přeli. Ale ně, runje meteorologiski spočatk nalěća smědźachmy so gratu přimać, zo bychmy na chódnikach, schodach a přijězdach do garaže sněh rumowali, kotryž je so cyłu nóc našoł. Cyle tak, kaž bě hižo wjacore dny připowědźene, je so wot wčera wječora njepřestawajcy sněžiło, tak zo dźensa w Hornjej Łužicy hač do dźesać centimetrow sněha naměrichu.

Byrnjež šoferojo poprawom chwile měli so na to nastajić, je w nocy a rano k wjacorym wobchadnym njezbožam dóšło. Tragiski wukónc měješe zražka na zwjazkowej dróze B 6 w Großharthauwje. Tam bě wodźer Audija na napřećiwnu jězdnju zajěł. Runje w tym wokomiku přijědźe jemu nakładne awto napřećo, zrazy do Audija a stłóči jón na kromje puća do wobhrodźenja. 42lětny šofer wosoboweho­ awta hišće na městnje njezboža zemrě.