Brězowka (AK/SN). Gmejna Dźěwin dyrbi so dołhodobnje na deficit w swojim etaće nastajić. Tole podšmórny komornica Carmen Petrik na zašłym posedźenju gmejnskeje rady. „Hospodarski plan 2016 kaž tež plany přichodnych lět njebudźemy wurunać móc. Deficit budźe přichodnje wobstajnje dale přiběrać“, wona rozłoži. Jeničce lětsa pobrachuje w zarjadniskim wobłuku etata 336 000 eurow. W zamóženskim wobłuku, z kotrehož financuja předwidźane inwesticije, je to 140 000 eurow.

Gmejna nětko na komplikowane ­pjenježne połoženje reaguje. Tak ma ­ležownostny dawk A za ratarske a lěsniske płoniny wot 280 na 290 procentow postupić; ležownostny dawk B za twarske ležownosće a tajke, hdźež hodźi so přichodnje twarić, pak wot 370 na 412 procentow. „Wobě dawkowej sadźbje wotpowědujetej potom krajnemu přerězkej“, rjekny Carmen Petrick. Swoju přiražku za tych, kotřiž sej w gmejnje nowy dom twarja abo stary přetwarjeja, chcedźa přiwšěm dale wobchować. Za dróhotwarske naprawy dóstanje gmejna wot Swobodneho ststa Sakskeje lětsa 28 000 eurow, při čimž dyrbi swójski podźěl dźesać procentow přidać.