Worklecy (BŠ/SN). Na diskusiju wo přichodźe kapałki we wsy su so zawčerawšim Worklečanscy wobydlerjo zetkali. W juniju wopušća poslednje sotry Božeje předwidźiwosće Worklecy, a tak wotpadnje tež jich duchowny. Schorjeneho fararja Rolfa Hocka su minjeny čas serbscy duchowni zastupowali. Tola hdyž wón hižo na městnje njebudźe, njebudźe tež wjace zastupowany, rozłoži Chróšćanski farar Měrćin Deleńk. Něhdźe 50 wčera přitomnych Worklečanow a wobydlerjow z wokoliny pak by wobstejnosće najradšo tak wostajiło, kaž runje su. Dowidźachu wšak, zo njeje to lochko. Hižo nětko je přemało serbskich duchownych, a njebudźe lěpje.