Symjo nimale pozabytych družin sadu, zeleniny a kwětkow měnjeli
Njebjelčicy (HS/SN). Jako wulki wuspěch posudźowachu organizatorojo wčerawšu prěnju měnjensku bursu symjenja w Njebjelčicach. Něhdźe 50 zajimcow z blišeje wokoliny, ale tež ze zdalenišich kónčin je składnosć wužiwało, wobstarać sej symjo sadu, zeleniny a kwětkow a za to swójske poskićeć. Na nastork wuchodosakskeje skupiny towarstwa k zachowanju mnohotnosće wužitnych rostlin (VEN) su Njebjelčanska gmejna, wuměłstwowe towarstwo Kamjenjak kaž tež tamniše domizniske a kulturne towarstwo bursu jako prěnju w Kamjenskej kónčinje na nohi stajili.
Čłonka VEN Beate Mücke ze Strawaldy měješe wulki wuběr symjenja sobu a rozprawješe zahoriće wo Budyskej kórce a wo čěskim kulirabiju. Jeju symjo dźensa w žanym wobchodźe njedóstanješ, dokelž so wulke koncerny jenož na jara mały wuběr družin specializuja.