Posudki jasnje rjaduja, što je dowolene a što nic
Kubšicy (CK/SN). Přemysłowej přestrjeni na Lětońskim lětanišću so Kubšiska gmejna dalši krok bliži. Nazymu 2014 bě so jeje rada rozsudźiła, při starym tankowym składźe twarski plan nastajić. Na terenje, kotryž njeje w přisłušnosći lětanskeho zarjada, móhli so přemysłowe a industrijne předewzaća zasydlić. Za to pak dyrbjachu wjacore posudki zhotowić dać, mjez druhim wo škiće před haru a wo wotwodźowanju wopłóčkow. Dalši posudk zaběraše so ze škitom zwěriny. W mjenowanym wobłuku sydla nimo wulkeje ličby ptačkow tež wšelake družiny njetopyrjow, reptilijow a amfibijow.