Přihoty na jutry drje steja tuchwilu wšudźe w srjedźišću. W klóštrje Marijinej hwězdźe pak wusměrjeja so hižo na čas jutrownych prózdnin, hdyž wočakuja staršich ze swojimi dźěćimi.
Pančicy-Kukow (SN). Sobudźěłaćerjo klóštra Marijineje hwězdy w Pančicach-Kukowje wjesela so w jutrownych prózdninach znowa na wjele wopytowarjow swójbneho popołdnja, předewšěm na dźěći z jich staršimi abo z dźědom a wowku. Mnozy maja tónle kruty termin swójbneho wulěta hižo do protyčki zapisany. Tak su přistajeni klóštra a dalši tež lětsa zaso tójšto překwapjenkow spřihotowali a hižo njesćerpnje na to čakaja, zo by wjele hosći srjedu, 30. měrca, wot 13 do 17 hodź. přichwatało, zdźěli Křesćansko-socialny kubłanski skutk CSB. Klóšter Marijina hwězda, zarjadniski zwjazk Při Klóšterskej wodźe, dźěłarnje zbrašenych a CSB jich do zežiwjenskeho a zeloweho centruma w klóštrje wutrobnje přeprošeja.