„Je kliknyło?“ rěkaše akcija, při kotrejž móžachu šoferojo wot póndźele hač do dźensnišeho na awtodróhowym wotpočnišću „Hornja Łužica“ pola Słoneje Boršće sami nazhonić, kotre wuskutki ma, hdyž we wosobowym abo nakładnym awće připasany njejsy. Tež redaktor Serbskich Nowin chcyše to wědźeć.

Sam bych wo sebi rjekł, zo sym nastupajo připasanje w awće porjadny wobdźělnik nadróžneho wobchada. Rano na dźěło, popołdnju domoj, wječor raz słužbny termin abo do Kamjenca něšto wobstarać – to so někak awtomatisce připasam. Ale spěšnje raz we wsy nakupować abo tankować jěć – to žno wěstotny pas tež raz wostanje, hdźež je. A runje to móhło zahubne być.