Wjacore tydźenje a měsacy su so we Wojerowskej radnicy z prašenjom zaběrali, čehodla bě twar noweho wobydlerskeho centruma tójšto dróši hač planowany. Wčera dóstachu měšćanscy radźićeljo wjacore wotmołwy.
Wojerecy (AK/SN). Přidatne wudawki 760 000 eurow při twarje Wojerowskeho wobydlerskeho centruma Piwarska hasa 1 změja konsekwency. Tole připowědźi wyši měšćanosta Stefan Skora (CDU) na wčerawšim posedźenju měšćanskeje rady. Wón rozłoži radźićelam kónčnu rozprawu wuběrka „Piwarska hasa 1“, kotryž chcyše wot zarjadnistwa wotmołwy na 49 prašenjow.
„To bě jara dołhi proces“, rjekny Stefan Skora. Njeje pak tak, zo by něchtó z wobdźělenych dopokazujomnje swoje winowatosće zanjechał. Skerje rěčeše Skora wo cyłej lisćinje přičinow. Tak su projekt předołho planowali a přihotowali, tele dźěło samo nachwilnje přetorhnyli a lěta 2008 dale wjedli. 2014 měješe wšitko hotowe być, twarske dźěła pak trajachu hač do awgusta 2015. Hižo prjedy, hač su twarić započeli, podróšichu so twarske kóšty wo šěsć procentow, hač do kónca projekta rozrosćechu wone wo 15 procentow.